Ciclo 'Vítimas da Guerra Civil e da ditadura na provincia de Pontevedra'

O Ateneo Atlántico de Vigo, a través da súa Comisión de Pensamento e Debate, puxo en marcha un ciclo de actividades moi necesario que se estenderá durante todo o primeiro semestre de 2026. Chámase ‘Memoria Democrática’ e o seu título completo é ‘Vítimas da Guerra Civil e da ditadura na provincia de Pontevedra’. A idea central é clara: combater os bulos e a desinformación que intentan branquear o franquismo e, sobre todo, que a sociedade recoñeza o valor daqueles homes e mulleres que loitaron e sufriron pola liberdade e a democracia. O ciclo conta coa subvención do Ministerio de Política Territorial y Memoria Democrática e está dirixido ao público xeral, sendo ademais un evento de balde.

O programa está composto por seis sesións que se reparten en diversas sedes da cidade, desde o MARCO ata institutos de ensino. A primeira cita é este xoves, 22 de xaneiro, ás 19:30 h no Auditorio do MARCO, onde se abordará O papel da investigación na Memoria Democrática coas poñentes Conchi López Sánchez e Montse Fajardo. Despois, o 10 de febreiro na Aula Praza da Miñoca, haberá unha sesión moi centrada nas testemuñas de familiares e amigos das vítimas do golpe de estado, contando con Manuel Bragado, Pepe Álvarez Cáccamo, Jacinto Mosquera e Xavier Moreda.

O ciclo tamén ten un foco educativo, con dúas actividades dirixidas especificamente ao alumnado en institutos, como a charla sobre A represión franquista nos campos de concentración no IES Politécnico o 25 de marzo, ou a presentación da Banda Deseñada Regreso á Illa de San Simón con Kiko da Silva no IES O Castro o 14 de abril. Para o público xeral, o 15 de maio no Salón de actos da ONCE, a sesión centrarase nos Perseguidos da ditadura (1950–1975). Finalmente, o ciclo pecha o 11 de xuño no Salón de actos do MARCO cunha figura clave no eido da antropoloxía forense: Francisco Etxeberria Gabilondo, que falará sobre O dereito á memoria, á dignidade e á reparación.